"സെഹെരി....സെഹെരി.." ജെമിനി മ്യൂസികില് ഈ പാട്ട് കേട്ടു കൊണ്ടിരിക്കുംബോഴാണ് ഈ ബ്ലോഗ് എഴുതണമെന്ന് തോന്നുന്നത്.ഈ പാട്ടും ബ്ലോഗും തമ്മില് യാതൊരു ബന്ധവുമില്ലാട്ടോ.അല്ലെങ്കിലും ജീവിതത്തില് സംഭവിക്കുന്നത് പരസ്പര ബന്ധമില്ലാത്ത കാര്യങ്ങളാണല്ലോ.പഠിക്കുന്ന ശീലം പണ്ട് മുതലേ ഇല്ലാത്തത് കൊണ്ട് ഫ്രീ ടൈം ധാരാളമുണ്ട്.ആ ഫ്രീ ടൈമില് കുത്തി കുറിക്കുന്ന അക്ഷര കൂട്ടുകളാണ് ഈ ബ്ലോഗില് നിറച്ചും.എന്തായാലും ഇന്റ്റോ സ്കിപ് ചെയ്തു നമുക്ക് സബ്ജെക്റ്റിലേക്ക് ചാടാം.
ഇന്ന് രാവിലെ എന്റെ ഒരു സുഹൃത്തിന്റെ ഫോണ് വിളി കേട്ടാണ് ഞാന് ഉറക്കമുണര്ന്നത്.സാധാരണ വീട്ടിലായിരിക്കുമ്പോള് ഞാന് കഴിയുന്നതും ഫോണ് അറ്റെന്ഡ് ചെയ്യാറില്ല.എന്തെങ്കിലും പണി വരും എന്നുള്ളത് തന്നെ കാരണം.എന്തായാലും ഇന്ന് ഞാന് ഫോണെടുത്തു.
"ഹലോ.." ഉറക്കചടവോടെ ഞാന് പറഞ്ഞു.
"ഹലോ എടാ ഇത് രാഹുലാ..യൂത്ത് കോണ്ഗ്രെസ്സിന്റെ ..നമ്മുടെ ഈ കൊല്ലത്തെ മെംബര്ഷിപ്പ് കാംപേയ്ന് തുടങ്ങീട്ടുണ്ട്.ഏട്ടന്റടുത്ത് ഞാന് ആപ്ലികേഷന് ഫോം കൊടുത്തയച്ചിരുന്നു ..കിട്ടിയില്ലേ?"
"ഇല്ലെടാ ഏട്ടന് എന്നോടു ഒന്നും പറഞ്ഞിട്ടില്ല.ഞാന് ചോദിച്ചിട്ട് നിന്നെ തിരിച്ചു വിളിക്കാം."
========================================================================
സംഭവം ഞാന് ഒരു രാഷ്ട്രീയ പാര്ടിയുടെയും ആളല്ല.എനിക്കീ പരിപാടിയോട് തന്നെ താല്പര്യമില്ല.പിന്നെ ഞാന് ഇത് വരെ ആകെ ഒരു തവണയെ വോട്ട് ചെയ്തിട്ടുള്ളൂ.അതിന്റെ കാരണം രസകരമാണ്.പഞ്ചായത്ത് തിരഞ്ഞെടുപ്പിന്റെ പട്ടിക വന്നപ്പോള് എന്റെ വീട്ടില് ഞാന് മാത്രം വേറെ വാര്ഡിലായി പോയി.കോണ്ഗ്രെസ്സിന്റെയും കമ്യൂണിസ്റ്റ് പാര്ടിയുടെയും സ്ഥാനാര്ത്തികളും ശിങ്കിടികളും വീട്ടില് വന്നു അച്ഛന്റെയും അമ്മയുടെയും ഏട്ടന്റെയും വോട്ടഭ്യര്ത്തിച്ചു.എന്നാല് വടി പോലെ നില്ക്കുന്ന എന്നോടു അറ്റ്ലീസ്റ്റ് ഒരു "എന്താ മോനേ,സുഖമല്ലേ " എന്നെങ്കിലും ചോദിക്കാമായിരുന്നു.അവരത് ചെയ്തില്ല.എന്തായാലും അതില് പ്രതിഷേധിച്ച് ഞാന് അപ്പുറത്തെ വാര്ഡായ കാരന്തൂരില് പോയി 2 മണിക്കൂര് വരി നിന്ന് താമരയ്ക്ക് എന്റെ വോട്ട് ചാര്ത്തി.താമര വിരിഞ്ഞില്ലെങ്കിലും എന്റെ മനസ്സിന് ശാന്തി കിട്ടി.
========================================================================
അങ്ങനെ ഞാന് എണീറ്റ് ചെന്ന് എട്ടനോട് വിവരം അന്വേഷിച്ചു.അവനാവട്ടെ എന്റെ അത്രയും ഇതില് താല്പര്യമില്ല.
"എന്തായാലും ചെക്കനെ പിണക്കണ്ട.ഭാവിയില് എം.എല്..,എ യോ മന്ത്രിയോ ആവില്ലെന്ന് എന്താ ഉറപ്പ്.. ഐഡെന്റിറ്റി കാര്ഡിന്റെ ഫോടോസ്ടാടും ഒരു ഫോട്ടോയും ഞാന് തരാം,അത് അവന് കൊണ്ട് പോയി കൊടുത്തേക്ക്.നീയും കൊടുത്തോ."
എല്ലാ ഗുലുമാലുകളും എന്റെ തലേലേക്ക് കെട്ടി വെക്കുക എന്നുള്ളത് പണ്ടേ അവന്റെ ശീലമാണ്.കഴിഞ്ഞ കൊല്ലം ഇതേ സീന് ഞാന് കൊലവേറി ആടിയതാണ്.ആക്ചുവല്ലി ഈ ചെക്കന്റെ വീട് കാരന്തൂരാണ്.അന്ന് എനിക്കവനെ ശരിക്ക് പരിചയമില്ല.ഏട്ടനുമായിട്ടാണ് അന്നവന്റെ ഡീലീങ്സ് മുഴുവന്., ഉഡായിപ്പ് വിത്ത് ഉഡായിപ്പ്. അങ്ങനെയിരിക്കുംബോഴാണ് കെ.എസ്.യു വിന്റെ തിരഞ്ഞെടുപ്പ് വരുന്നത്. ഈ ചെക്കനും മല്സരിക്കുന്നുണ്ടായിരുന്നു.അങ്ങനെ ജയം ഉറപ്പിക്കാന് ഇവന് തനിക്ക് ലഭിക്കാന് പോവുന്ന വോട്ടിന്റെ കണക്കെടുത്ത് സ്വപ്നസഞ്ചാരം തുടങ്ങി.ആ സഞ്ചാരത്തിന് എണ്ണയടിച്ച് കൊടുക്കുന്നതില് എന്റെ ഏട്ടന്റെ വോട്ടും ഒരു പ്രധാന പങ്ക് വഹിച്ചിരുന്നു.
അങ്ങനെ തിരഞ്ഞെടുപ്പ് ദിവസം വന്നെത്തി.കാരന്തൂര് ബാങ്കിന്റെ ഓഡിറ്റോറിയത്തില് വെച്ചായിരുന്നു തിരഞ്ഞെടുപ്പ്.പതിവ് പോലെ ഏട്ടന്റെ ഉഡായിപ്പ് സ്കീം അന്നും വര്ക്ക് ഔട്ടായി.പെട്ടന്നുള്ള എന്തോ മീറ്റിങ്.എന്നോടു ചെന്ന് വോട്ട് ചെയ്യാന് പറഞ്ഞു.എനിക്കാണെല് കോളേജിലും പോവണം.അന്നവന്റെ പേര് പോലും എനിക്കറിയില്ലായിരുന്നു.
"എനിക്കു പറ്റില്ല..കോളേജില് പോണം."
അതിനു മറുപടിയായി നീട്ടിയോന്നു തുപ്പിയിട്ട് അവന് പറഞ്ഞു:
"പിന്നെ കോളേജ്..ഒന്നു ചെല്ലടെ.."
അങ്ങനെ ഞാന് സംഭവ സ്ഥലത്തെത്തി.ആ ചെക്കനെ അവിടെ എവിടെയും മഷിയിട്ട് നോക്കിയിട്ട് കാണാനില്ല.രാഹുല് ജിയുടെ കല്പന വല്ലതുമുണ്ടാവും സ്ഥാനാര്ത്തികള് ബൂത്തില് കയറാന് പാടില്ലാന്നു.മനസ്സിലെ ചോദ്യത്തിനൊക്കെ ഉത്തരം ഞാന് തന്നെ കൊടുത്ത് വോട്ടു ചെയ്യാന് കയറി.കുത്താനുള്ള കടലാസ്സു കയ്യില് കിട്ടി.അതിലേക്ക് നോക്കിയപ്പോളാണ് ലഡു മനസ്സില് പൊട്ടിയത്.അവന്റെ പേരെനിക്കറിയില്ല.ലിസ്റ്റിലാണെല് കണ്ടമാനം പേരും.ഇനി എല്ലാ മെംബേര്മാരും സ്ഥാനാര്ത്തികളാണോ? കടലാസ്സു എന്റെ കയ്യിലെക്ക് തന്ന ഷേവ് ചെയ്ത കുരങ്ങന്റടുത്ത് ഞാന് ചോദിച്ചു:
"അല്ല നമ്മുടെ ആ ചെക്കനില്ലേ? കുറച്ചു തടിച്ചിട്ട് ..താടി വെച്ച.. ഓന്റെ പേരെന്തായിരുന്നു?"
"ആരാ മ്മടെ സുബൈറാ?"
"അല്ല.."
"മുന്ഷിറാണോ? കോയക്കാന്റെ മോന്?"
സുബൈറും മുന്ഷീറുമൊന്നുമല്ല..ചെക്കനെ ഞാന് ചന്ദന കുറിയൊക്കെ പൂശി അമ്പലത്തില് വെച്ചു കണ്ടതാ. .കൂടുതലൊന്നും പറയാതെ ഞാന് കുത്താനുള്ള സാമഗ്രിയും വാങ്ങി മുന്നോട്ട് നടന്നു.ആര്ക്കോ ഒന്നു കുത്തി.പുറത്തിറങ്ങി.
കുറച്ചു ആഴ്ചകള്ക് ശേഷം ഞാനും എട്ടനും ബൈകില് പോവുമ്പോള് ആ ചെക്കനെ പിന്നെയും കണ്ടു.ഏട്ടന് ബൈക്ക് നിര്ത്തി.
"അല്ല രാഹുലേ.. എന്തായി എലേക്ഷന്?"
രാഹുല്..,അപ്പോ അതാണ് ഈ മൊതലിന്റെ പേര്.ഞാന് മനസ്സില് പറഞ്ഞു.ഞാന് അന്ന് കുത്തിയത് ഏതോ അരുണ് വാസുവിനായിരുന്നു.
"ഒരു വോട്ടിന് മിസ്സായി ഏട്ടാ..എവിടെയോ ഒരു വോട്ടു മിസ്സായി"
"ഓ സാരമില്ലടാ ..ഇമ്പക്ക് അടുത്ത ചാന്സില് പിടിക്കാം.."
ഇതും പറഞ്ഞു വണ്ടി മുന്നോട്ടെടുത്ത എട്ടനോട് ഞാന് പറഞ്ഞു:
"ആ മിസ്സായ വോട്ടു എന്റെതാ.."
അത് പറയലും ബ്രേക്ക് പിടിക്കലും ഒരുമിച്ചായിരുന്നു..